کابل د ښوونځیو د ورزشي ټیمونو ترمنځ د سوک وهنې سیالۍ ترسره شوې
له افغانستان څخه د شوروي ځواکونو د وتلو د کلیزې په ویاړ په کابل کې د ښوونځیو د زده کوونکو ترمنځ د سوک وهنې سیالۍ پیل شوې.
په دې سیالیو کې د کابل د پوهنې ریاست د ۱۳ د ورزشي ټیمونو او د ۹ شخصي کلپونو ترمنځ د سوک وهنې سیالۍ د پوهنې وزارت په ورزشي میدان کې ترسره شوې.
د سياليو د پرانستلو په مراسمو کې د پوهنې وزارت د لومړنيو او اساسي زده کړو د رياست د رئيس مولوي محمد رحيم ايوب سربېره د دغه رياست يو شمېر ورزشکارانو، زده کوونکو او د پوهنې رياست مسوولينو ګډون درلود.
په پیل کې د پوهنې وزارت د لومړنیو او اساسي زده کړو رئیس د سپورت پر ارزښت وینا وکړه او سپورت یې د خلکو د روغتیا او جسمي پیاوړتیا په برخه کې مهم وباله او زیاته یې کړه چې پوهنې وزارت لا هم هڅه کوي چې د سالمو ورزشي سیالیو لپاره اسانتیاوې برابرې کړي.
د دې رياست د بدني روزنې د مسوولينو د معلوماتو له مخې، ټاکل شوې ده، چې سيالو لوبډلو په دوو ورځو کې د ريفري او روزونکو په شتون کې خپلې سيالۍ ترسره کړي او د لوبې په وروستۍ ورځ به ګټونکې لوبډلې د مسوولينو له خوا وستایل شي.
