پوهنې وزیر او د جمهور رئیس مشاور د مالي کړنو د ښه والي پلان (FPIP) په اړه خبرې اترې وکړې
پوهنې وزارت- کابل: پوهنې وزیر ډاکتر محمدمیرویس بلخي د افغانستان جمهور رئیس له مشاور اندرو لیانګ او ماليې وزیر سره لیدنه وکړه او د بودجې مصرف او مالي کړنو د ښه والي پلان (FPIP) په اړه یې پوهنې وزارت کې خبرې اترې وکړې.
دا لیدنه چې د پوهنې وزارت په کوربه توب تر سره شوه، دواړو لورو په پوهنې وزارت کې په اصولي شکل د بودجې مصرف اندازې او د دې موضوع د قوت او ضعف نقطې د څیړنې لاندې ونیولې.
پوهنې وزیر په دې لیدنه کې د ښوونې او روزنې بودجې مصرف لمړیتوبونو او د شته ستونزو څخه، او همدارنګه د مبایل له لارې د ښوونکو او پوهنې کارکوونکو د معاشونو ورکولو شته ننګونو څخه هم یادونه وکړه.
د افغانستان جمهور رئیس مشاور پوهنې وزارت کې د بودجې مصرف او مالي کړنو د ښه والي پلان طرحې د پلې کولو څخه خبر ورکړ او په دې برخه کې یې د پوهنې وزارت له کړنو څخه خوښې وښوده.
د یادونې وړ ده چې په پام کې ده چې د دې طرحې په چوکاټ کې د بودجې مصرف سیستم له بیاکتنې او د راغلو نتیجو له څيړلو وروسته، په دولتي بنسټونو او وزارتو کې د هغو پلې کولو په اړه تصمیم ونیول وشي.
