د لوګر یوه ښوونځي ته یوه قومي مشر ځمکه وقف کړه
د پوهنې وزارت_لوګر: د لوګر ولایت د برکي برک ولسوالۍ یوه قومي مشر په خپله خوښه د یوه ښوونځي د جوړولو لپاره ځمکه وقف کړه.
دغه قومي مشر الحاج عبیدالله نومیږي، چې خپله یو جریب ځمکه یې د شهید محمد انور په نوم د نجونو او هلکانو لومړني ښوونځي ته وقف کړې ده.
یاد ښوونځی ۸ کاله مخکې د ودانۍ د نه لرلو له امله په یوه شخصي کور کې فعال شوی، چې د ۲۳۱ نجونو په ګډون ۴۹۳ زده کوونکي لري.
د لوګر د پوهنې سرپرست رئیس نثار احمد سیدي د نوموړي قومي مشر د یاد کار ستاینه وکړه او دا یې له ثوابه ډک کار وباله.
د پوهنې رئیس زیاته کړه، چې پر یادې ځمکې به په راتلونکې کال کې د ولسي تړون یا اقراء پروګرام له لارې ودانۍ جوړه شي.
د یادونې وړده، چې د روان کال له پیله تر اوسه د لوګر یو شمېر قومي مشرانو ۱۲ ښوونځیو ته ۲۵ جریبه ځمکې وقف کړي دي.
