د پوهنې او عامې روغتیا وزیرانو په ښوونځیو کې د کورونا ویروس خپریدو د مخنیوي پروګرامونو په اړه غونډه وکړه
پوهنې وزارت- کابل: د پوهنې وزیر ډاکتر محمدمیرویس بلخي او د عامې روغتیا وزیر ډاکتر فیروز الدین فیروز د ګډې همکاري په موخه د هیواد د ګرمې او یخې هوا لرونکو ولایتونو په ښوونځیو کې د کورونا ویروس د خپریدو د مخنیوي پروګرامونو په اړه لیدنه او خبرې اترې وکړې.
دا لیدنه چې د پوهنې وزارت په کوربتوب ترسره شوه، پوهنې وزیر یادونه وکړه چې د کرونا ویروس د خپریدو په اړه د نړي اوسني حالت او په افغانستان کې څو پیښې، پدې برخه کې د مخنیوي او پوهاوي لوړولو برنامو ته پاملرنه په ځانګړي ډول د ښوونځيو په چاپیریال کې خورا مهم دی.
پوهنې وزیر د دې په دوام سره زیاته کړه چې په اوسني وخت کې د زده کړو ټولګي په ګرمې هوا لرونکو ۹ ولایتونو کې پرانستل شوي دي، او همدارنګه مونږ د سړو سیمو ښوونځیو پرانستلو ته هم نږدې یو، اوسنیو حالاتو ته په کتو، پوهنې وزارت په پام کې لري چې د عامې روغتیا وزارت سره په ګډه د کرونا ویروس په اړه په ښوونځیو او کورني چاپیریال کې د ښوونکو او زده کوونکو د حفظ الصحې مراعاتولولو په اړه د پوهاوي پروګرامونه په پام کې ونیسي.
پوهنې وزیر ټینګار وکړ چې پوهنې وزارت د ۱۰۰ زره څخه د زیاتو سارندو یانو، ښوونکو او زده کوونکو پراخه ټولنې په واسطه په مرکز او ولایتونو کې د عامه پوهاوي وړتیا لري، او همدارنګه پوهنې وزارت د دې آمادګي لري چې د دې موضوع د اهمیت له پلوه په ښوونځيو کې د کرونا ویروس په اړه په ښوونځیو کې یو درسي ساعت ځانګړي کړي.
د افغانستان د عامې روغتیا وزیر ډاکتر فیروز الدین فیروز په دې وروستیو ورځو کې د ایران څخه افغانستان ته د ۵۰ زره افغانیانو د راتګ خبر ورکړ، او ټینګار یې وکړ چې سره د دې چې په دومره زیات شمیر مهاجرین هیواد ته راغلي، اړین دي چې د وزارتونو تر مینځ په مختلفو برخو کې همکاري رامینځ ته شي تر څو وکولای شو په افغانستان کې د دې ناروغي مخه ونیسو.
د عامې روغتیا وزیرهمدارنګه په ښوونځیو کې د روغتیا زده کړې توکو چمتو کولو ، د ښوونکو او زده کونکو ترمنځ د ګډ پوهاوي برنامې جوړول ، او د ناروغۍ د خپریدو مخنیوي، پوهاوي لوړولو او خبرورکولو لپاره د چمتوالي خبر ورکړ.
د دې غونډې د پریکړې په آساس، د دواړو پوهنې او عامې روغتیا وزارتونو په شتون کې تخنیکي ټیمونه جوړ، او په پام کې ده چې په دې برخه کې په جدي ډول مشترکه همکاري شروع شي.
