د بامیان ولایت د نسپتان ښوونځي ودانۍ ګټي اخیستني ته وسپارل شوه
د پوهنې وزارت، بامیان: د بامیان ولایت د ورس ولسوالی د نسپتان ښوونځي نوي ودانۍ د یولړ مراسمو په ترڅ کې د یاد ولایت د پوهنې رییس محمد ایوب امیری، د ورس ولسوال عزیز امینیار، قومي مشرانو، ښوونکو او زده کوونکو په شتون کې پرانیستل شو.
د نسپتان ښوونځي ودانۍ په پاخه او اساسي ډول په یو پوړ کې د هندوستان دولت په مالی مرسته د ۱۱ میلیون ۴۲۱ زره ۳۹۱ افغانیو په مجموعي لګښت جوړ شوی چې، ۶ درسي ټولګي، د احاطي دیوال، د پاکو اوبو څاه، تشنابونه او نوري اړیني اسانتیاوي لري چې له پرانیستلو سره یې د یاد ښوونځي زده کوونکو ته د خوندي درسي چاپیریال زمینه برابره شوه.
د بامیانو د پوهنې رییس محمد ایوب امیري په خپلو خبرو کې د ښوونځي د نوې ودانۍ د پرانېستو له امله زده کوونکو اود سیمې اوسېدونکو ته مبارکي وویله او د سيمې له خلکو يې وغوښتل چې د ښوونځي په ساتلو کې د مسئولينو سره همکاري وکړي.
د پوهنې رییس ښوونه اوروزنه د یوې ټولنې پرمختګ وباله او له اوسیدونکو او ښوونکو یې وغوښتل چې د ماشومانو د تعلیم لپاره د پوهنې ریاست سره په همکارۍ کې غوره امکانات رامنځته کړي.
