د پوهنې وزارت (۴) ګڼه اونیز اداري مجلس دایر شو
د پوهنې وزارت د مرکزي رئیسانو (۴) ګڼه اونیز اداري مجلس د یاد وزارت د ښوونې او روزنې دمعین الحاج مولوي سخاءالله سعید په مشرۍ دایر شو.
په یاد مجلس کې دقرآن عظیم الشان د څو مبارکو ایاتونو تر تلاوت وروسته د پوهنې د مرکزي وزارت او اړوندو دفترونو د ودانیو د امنیت لپاره جوړه شوې طرحه قرائت او د رایو په اتفاق سره تصویب شوه.
همدارنګه د مؤظف شوي هیئت له لوري دکابل ښارتعلیمي مرکزونو او کورسونو ته ترتیب شوې سپارښتنې هم قرائت او د مجلس د ټولو غړو له لوري تایید او منظور شوې.
وروسته د اجنډا مطابق په موضوعاتو بحث پیل شو. دپوهنې وزارت د اړوند میلمستون د خدماتو د لا زیات سمون په موخه پرېکړه وشوه چې د یاد میلمستون لپاره دې یو تن مسئول او د لګښتونو د معلومولو او محاسبې لپاره دې یو فني هیئت وټاکل شي.
د املاکو او تعمیراتو ریاست اړوند د ترمیماتو د آمریت چې په نوي تشکیل کې منحل شوی، د اضافه بست شویو کارمندانو د سرنوشت د معلومولو اود یاد آمریت د دندو د اجراء لپاره د خدمتي فني کسانو د ګمارنې په موخه د یاد وزارت د سرچینو او ادارې د معین شیخ مولوي سعیداحمد شهیدخیل په مشرۍ یو څلور کسیز هیئت وټاکل شو.
همدارنګه دې ته ورته نور مسایل هم تر بحث لاندې ونیول شول.
غونډه د پوهنې وزارت د اسلامي تعلیماتو د معین الحاج مولوي کرامت الله اخندزاده له لوري د دعائیې په لوستلو سره پای ته ورسیده.
