د پوهنې وزارت د ښوونکو د مسلکي پراختیا د رئیس په مشرۍ رسمي پلاوی د سمنګان ولایت ته ورسېد
د پوهنې وزارت د ښوونکو د مسلکي پراختیا د رئیس مولوي سمیع الحق حماس په مشرۍ پلاوي چې د اساسي او ثانوي زده کړو د ریاست، د احصائیې د ریاست او د سواد د زده کړې ریاست استازي یې په ترکیب کې شامل دي، د هیواد بیلابیلو ولایتونو ته د خپلو سفرونو په لړ کې د سمنګان ولایت د تعلیمي بهیر د هر اړخیزې څارنې او ارزونې په موخه یاد ولایت ته سفر وکړ.
پلاوي د خپل سفر په پیل کې د یاد ولایت د پوهنې له رئیس مولوي نصرت الله فیضاني او د ریاست له نورو مسئولینو سره ولیدل، هغوی ته یې د خپل سفر موخې تشریح کړې او دهغوی له تاوده هرکلي او همکارۍ څخه یې کورودانی او مننه وکړه.
د سمنګان د پوهنې رئیس راغلي هیئت ته ښه راغلاست ووایه، د تعلیمي چارو اررزونه او څارنه یې یو اړین کار وباله، په یاده پروسه کې یې له راغلي هیئت سره د بشپړې همکاري ژمنه وکړه او زیاته یې کړه، چې په تیرو درې لسیزو کې دا لومړنی پلاوی دی چې د پوهنې له وزارت څخه یاد ولایت ته راځي او دلته د تعلیمي بهیر څارنه او ارزونه کوي.
