د هېواد له ولایتونو څخه د پوهنې لنډ خبرونه
لغمان:
په لغمان ولايت کې يونيسف سيمه ييز دفتر د دغه ولايت له پوهنې رياست سره د ٩٨ زره ٥٧٤ امريکايي ډالرو په ارزښت د ٩٨ خېمو مرسته وکړه.
د لغمان ولایت د پوهنې رئیس مولوي شاه جهان ساجد د دغه ولایت له پوهنې سره د دې ادارې له دوامدارو مرستو څخه مننه وکړه
خوست:
د خوست ولايت د پوهنې رياست مسوولين وايي: د١٤٠١ لمريز کال له پيل څخه تراوسه پورې په خوست ولايت کې د يونسيف سیمه ییز دفتر د دغه ولايت د مرکز او ولسواليو د ښوونځيو په جوړولو او بیارغونو کې اته ميليونه او ٩٤٥ زره امريکايي ډالره لګولي دي .
د خوست د پوهنې رياست مشرتابه د يادې شوې ادارې له مرستو څخه د مننې ترڅنګ له دوى څخه غوښتنه وکړه، چې له پوهنې سره خپلې مرستې دوامداره وساتي.
فراه:
د فراه ولایت د دیارلسو مدارسو څخه ۱۲۳ تنه فارغ شول، چې د دغه ولایت د نظامي او ملکي چارواکو، دیني عالمانو او د فارغانو د کورنیو د غړو په ګډون د یوې سترې غونډې په ترڅ کې وستایل شول.
د دې ولایت د پوهنې رئیس اختر محمد زعیم فارغانو ته د مبارکۍ ویلو پرمهال له خلکو وغوښتل، چې خپل اولادونه دیني مدارسو ته واستوي.
کندهار:
د کندهار ولايت په غورک ولسوالۍ کې د OCCD موسسې مسوولينو د دغه ولايت د پوهنې رياست په مرسته د دې ولسوالۍ د سيمه ييزو زده کړو په ټولګيو او يو شمېر نورو ښوونځيو کې بخارۍ او د سونګ توکي ووېشلې.
مولوي داد محمد حنفي د غورک ولسوالۍ د پوهنې آمر د يادې شوې ادارې له مرستو څخه د مننې ترڅنګ د ژمي په موسم کې د دې مرستو د دوام غوښتنه وکړه.
ننګرهار:
په ننګرهار ولایت کې د یونیسف سیمه ییز دفتر د دغه ولایت په کوټ ولسوالۍ کې د ۳۵ سیمه ییزو او چټکو زده کړو ټولګیو ۴۲۰ زده کوونکو ته ښوونیز توکي، د حفظ الصحې کڅوړي او ژمنۍ جامې وویشلې.
د دغه ولايت د پوهنې مسوولينو د يادې ادارې له مرسته څخه مننه وکړه.
