په بلخ ولایت کې له دیني علماوو څخه ازموینه واخیستل شوه
د بلخ ولایت په دیني مدارسو کې د مدرسینو د ګمارلو په موخه ۵۶۱ خالي بستونو کې له ګڼ شمېر علماوو څخه د ولایت د مرستیال مولوي نورالهادي ابو ادریس او د پوهنې د رئیس الحاج مولوي عبدالجلیل شهیدخېل تر څارنې لاندې په پوره روڼتیا سره رقابتي ازموینه واخیستل شوه.
د بلخ ولايت مرستيال په خپلو خبرو کې مدارس د ديني علومو د ودې او پراختيا بنسټيز مرکز وباله او ويې ويل چې په دې برخه کې د افغانستان ا . ا ټولو دیني مدارسو او په ځانګړې توګه په لیرې پرتو سیمو کې دیني مدارسو ته ډېره پاملرنه لري.
نوموړي له خلکو څخه هيله وکړه چې د دیني مدارسو په جوړولو کې مرسته وکړي.
د پوهنې رئيس د ښوونې او روزنې او په ځانګړي ډول د دیني علومو پر ارزښت خبرې وکړې او زیاته یې کړه چې د پوهنې رياست هڅه کوي چې په يادو بستونو کې د علماوو د ګمارلو بهير چټک کړي، ترڅو ژر تر ژر دوی خپلې دندې پیل کړي.
