د زابل ولایت د یو شمېر ښوونځیو حلقوي دیوال جوړېږي
د زابل ولایت د پوهنې ریاست مسئولین وايي: یونیسف مؤسسه په پام کې لري، چې د پوهنې په برخه کې د خپلو مرستو په لړ کې دا ځل په دغه ولایت کې د ۴۶ ښوونځیو حلقوي دیوال جوړ کړي.
د دې پروژې قرارداد، چې د جوړولو چارې یې ۴۱۴ زره امریکایي ډالره اټکل شوی، د لوی کندهار ساختماني شرکت ته ورکړل شوې دي.
د یاد ولايت د پوهنې رئيس مولوي ګل ولي متقي وويل: د زابل پوهنې ریاست د معیاري او اساسي ښوونځیو له کمښت سره مخامخ دی او اوس هڅه کوي، چې د مرستندویو بنسټونو په راجلبولو سره د پوهنې په برخه کې ښه خدمتونه وړاندې کړي. نوموړی وایي د يادو ښوونځيو شاوخوا نهه زره زده کوونکي په ازاده فضا کې پر زده کړو بوخت دي او د يادې پروژې په بشپړېدو سره به ياده ستونزه تر یو څه حده هواره شي.
