د هېواد د صنعتکارانو اتحادیې او بهير ګروپ رئیس د پوهنې وزارت د سرچينو او ادارې له معين سره وکتل
د افغانستان د صنعتکارانو اتحادیې او بهیر ګروپ رئيس الحاج شیرباز کمین زاده، د پوهنې وزارت د سرچینو او ادارې له معين مولوي صبغت الله وصيل سره وکتل.
په پیل کې د پوهنې وزارت معين د هېواد صنعتکارانو پلاوي حضور ته ښه راغلاست ووایه او زیاته یې کړه، په افغانستان کې د.ا.ا. په بريا سره زياته اړتيا ليدل كېږي، تر څو د پوهنې د سکتور په ګډون په ټولو برخو کې د هېواد د سوداګرو او سرمایه دارانو په مادي او معنوي مرستو سره پراختیايي پوهنيز پروګرامونه پلي او د هغوى همکاري تر لاسه کړو.
په ورته مهال د هېواد د صنعتکارانو اتحادیې رئیس وویل، د پوهنې وزارت او خصوصي سکتور ترمنځ د متقابلې همکارۍ لپاره د ځانګړي سیستم رامنځته کولو ته اړتیا ده.
همدارنګه د پلاوي مشر د پوهنې وزارت له مشرتابه وغوښتل، چې د هېواد د تدارکاتو له قوانینو سره سم د بهیر مطبعې ته ضایع شوي کاغذونه او استهلاک شوي کتابونه برابر کړي، ترڅو دوی وکولای شي د کتابونو او کتابچو لپاره د پوښونو په چمتو کولو کې ترې ګټه پورته کړي.
د پوهنې وزارت معين په ياده برخه کې د همکارۍ ډاډ ورکړ.
