له ولايتونو د پوهنې لنډ خبرونه
هلمند
د هلمند ولايت پوهنې رئيس الحاج مولوي محمد عوض انصاري، د ياد ولايت نوزاد ولسوالۍ ته د يوه کاري سفر په ترڅ کې، د يو شمېر دارالعلومونو او ديني مدارسو له اداري او تدريسي کړنو څخه د څارنې پرمهال، د ورځنيو چارو پر لاښه والي ټينګار وکړ.
دغه راز نوموړي د يادو ښوونيزو بنسټونو ستونزې او وړاندیزونه ولیکل او د حل ژمنه یې وکړه.
همدارنګه:
د هلمند ولايت پوهنې رياست په ياد ولايت کې له پاکستان څخه له يوشمېر راستنو شويو کډوالو زده کوونکو څخه د سويې د تثبيت آزموينه واخيسته .
د هلمند پوهنې ریاست مسئولین وايي، د هېواد ماشومانو ته د زده کړو په برخه کې جدي هڅې کوي.
یو ځل بیا د ياد ولایت له پوهنې څخه:
د هلمند ولايت پوهنې رياست په اداري غونډه کې د پوهنې رئيس د ياد رياست د تېرو کړنو او پلانونو په اړه له کارکوونکو سره خبرې وکړې؛ د آسانتياوو رامنځته کولو او د ستونزو د حل په اړه يې لازم تصميمونه ونيول.
جوزجان
د جوزجان ولایت پوهنې رئیس الحاج مولوي محمد طاهر جواد د غیر رسمي ساعتونو په ترڅ کې، د آقچې ولسوالۍ د یوشمېر مدارسو په لیلیو کې د زده کوونکو شتون وڅېړه او هغوی ته یې د زده کړو په اړه معلومات ورکړل.
سمنګان
د سمنګان ولایت پوهنې رئیس الحاج مولوي نصرت الله فیضاني، په شمال زون کې د ټولنې د همغږۍ او پراختیا له مسئولینو سره وکتل.
همدارنګه نوموړي د ښوونیزو کړنو او چارو د لاګړندي کولو په تړاو یو ځل بیا د دوه اړخیزو همکاریو پر دوام خبرې وکړې.
