د پوهنې وزارت د اسلامي زده کړو معينيت له لورې نن د هېواد په ۱۳ ولایتونو کې د دیني مدارسو د ط.البانو څخه د خامسه او مافوق الثانویه درجو د تثبیت آزموینه واخیستل شوه.
نن د هېواد په ۱۳ حوزو (کابل، زابل، کندهار، پکتیا، ننګرهار، بدخشان، کندز، بلخ، هرات، هلمند، ارزګان، نیمروز او غور) ولایتونو کې د ط.البانو د خامسه او مافوق الثانویه درجو د تثبيت آزموینه واخیستل شوه، چې له ټول هېواد څخه په کې د مدارسو ١٣٠٠٠ تنو ط.البانو ګډون کړی وو.
همدارنګه د پوهنې وزارت د اسلامي زده کړو معينيت او د آزموینو ملي ادارې مسٸولينو د يادې آزموینې ګډون والو ته د لازمو آسانتیاوو برابرولو لپاره اړوندو ولایتونو ته سفرونه وکړل او په آزموینه کې يې د نظم او روڼتيا په موخه د اړوندو ولايتونو د پوهنې رياستونو سره په همغږۍ له دغه پروسې څخه څارنه ترسره کړه.
دغه راز د پوهنې وزارت د یادې آزموینې د څار، د هر ډول فساد د مخنیوي او ښه ترسراوي په موخه، ټولو ګډون والو ته ډاډ ورکوي، چې حق به حقدار ته سپارل کېږي.
په پام کې ده، چې د يادې آزموینې هغو بریالیو نوماندانو ته چې د خامسه درجې آزموینه يې ورکړي وي، د دولسم ټولګي معادل او د مافوق ثانويه درجې لپاره د څوارلسم ټولګي معادل سندونه ورکړل شي.
