د ولایتونو له پوهنې ډګره څو مهم خبرونه
کندوز
د پوهنې وزارت د داخلي پلټنې پلاوي، د کندوز ولایت پوهنې ریاست د مالي څانګې له کړنو د څرنګوالي په تړاو د خپلو څېړنو پایلې، د یاد ریاست له مشرتابه سره شریکې کړې.
یو ځل بیا هم له یاد ریاست څخه:
د کندوز ولایت پوهنې ریاست له ۷۷ تنو نوماندانو څخه رقابتي آزموینه واخیسته.
په پام کې ده، چې له دې جملې څخه ۲۵ تنه، د یاد ولایت د لیرې پرتو سیمو په ښوونځیو کې د ښوونکو په توګه وګمارل شي.
خوست
د خوست ولایت پوهنې ریاست د یاد ولایت د دیني مدارسو لپاره د نویو ښوونکو د ګمارلو په موخه، له ۱۰۰ تنو نوماندانو څخه رقابتي آزموینه واخیسته.
نیمروز
په نیمروز ولایت کې د سواد زده کړې له یوه ټولګي څخه ۲۶ تنه زده کوونکي فارغ شول.
په ورته مهال د پوهنې مسئولینو او علماوو په حضور کې فارغانو ته تصدیق پاڼې هم ووېشل شوې.
کاپیسا
یو خیریه بنسټ، په کاپیسا ولایت کې د ښوونځیو په ۲۰۰ تنو زده کوونکو باندې خوراکي توکي ووېشل.
د ياد ولايت پوهنې رياست د دغه مرسته کوونکي بنسټ له ملاتړ مننه وکړه او د همکاريو پر دوام يې ټينګار وکړ.
