پوهنې وزارت له لوري د فارياب په ګرزيوان ولسوالۍ کې د يو باب ښوونځي نوې ودانۍ ورغول شوه
د فاریاب ولایت پوهنې ریاست چارواکي د یاد ولایت ګرزیوان ولسوالۍ اړوند په دره جوز سیمه کې، یو باب ښوونځي لپاره د نوې ودانۍ پرانیستلو خبر ورکوي.
د یاد ولایت پوهنې رئيس الحاج مولوي محمد طاهر جواد وايي: د ګرزيوان ولسوالۍ دره جوز منځني ښوونځي ودانۍ چې ۶ درسي ټولګي، یوه لابراتواري خونه، احاطوي دېوال، د څښاک پاکو اوبو يو حلقه څاه، ۹۰ پايې مېزونه--څوکۍ او نور اړین ملحقات لري، د يو همکار بنسټ په مالي ملاتړ د ۷۶ زره امریکایي ډالرو لګښت سره رغول شوې ده.
په ورته وخت کې د سیمې اوسېدونکو د سالم ښوونیز چاپېریال رامنځته کولو په برخه کې د پوهنې وزارت په ځانګړي ډول د فاریاب ولایت پوهنې ریاست له هلوځلو د ستاینې ترڅنګ، د دغه ښوونیز بنسټ پر جوړېدو خوښي څرګنده کړه او ټینګار یې وکړ، چې خپل ماشومان به د ښوونې او روزنې ترلاسه کولو په موخه، ښوونیزو بنسټونو ته واستوي.
