په شبرغان ښار کې د "اسلام جوی" لومړني ښوونځي د ودانۍ بنسټ ډبره کېښودل شوه
د جوزجان ولايت پوهنې رئيس مولوي سيد حفيظ الله معتصم بالله، د یاد ولایت په شبرغان ښار کې د "اسلام جوی" لومړني ښوونځي د ودانۍ بنسټ ډبره کېښوده.
د بنسټ ډبرې اېښودلو مراسمو کې د پوهنې مسئولينو، علماء کرامو، استاذانو او سیمه ییزو مشرانو ګډون درلود.
د پوهنې رئيس په وينا، د یاد ښوونځي ودانۍ به په يو جرېب ځمکه کې، چې د همدغه سیمې د یو تن علم پروره شخصیت له لوري وقف شوې ده، جوړېږي.
د دغه ښوونځی ودانۍ چې ۶ درسي ټولګي، يوه اداري خونه او د ۳۴۰ متره په اوږدوالي احاطوي دېوال به ولري، د یو همکار بنسټ په مالي ملاتړ د ۱۰۰ زره امريکايي ډالرو لګښت سره جوړېږي.
د پوهنې وزارت مشرتابه د همدغه سیمې د خلکو له خوا د ځمکې له ورکړې او د پوهنې په برخه کې د همکارو ادارو د مرستو له امله مننه او قدرداني کوي.
