د پوهنې وزارت سرپرست غور ولایت ته رسمي سفر وکړ
د پوهنې وزارت د سرپرست الحاج مولوي حبیب الله آغا په مشرۍ یو لوړ پوړی پلاوی، د غور ولایت د ښوونیز او روزنیز وضعیت ارزونې په موخه یاد ولایت ته ولاړ او د دغه ولایت په چهارسده ولسوالۍ کې یې د«منبع العلوم دیني مدرسې» څخه لیدنه وکړه.
نوموړي په یاد دارالعلوم کې یوې سترې غونډې ته چې پکې د پوهنې رئيس، استادانو، علماءکرامو او د سيمه ييزو ادارو استازو ګډون درلود د خپلو خبرو پر مهال، د ټولنې په پرمختګ او اصلاح کې د پوهنې پر ګټو خبرې وکړې.
د پوهنې وزارت سرپرست په ټول هېواد کې د متوازنو ښوونیزو چوپړونو پر وړاندې کولو، په ځانګړي ډول هغو محرومو سیمو ته چې ستونزمنې او غرنۍ لارې لري، ټینګار وکړ او څرګنده یې کړه: زموږ د هېواد روښانه راتلونکی د باکيفيته زده کړو له لارې د ځوان نسل په پياوړتيا پورې تړلی دی او ژمنه يې وکړه چې پوهنې وزارت به پخپلو جدي هلو ځلو او د لازياتو ښوونیزو او روزنیزو آسانتياوو برابرولو سره په يادو سيمو کې د پوهنيزو بنسټونو پراختيا او پياوړتیا ته لاپسې دوام ورکړي.
نورو ويناوالو د پوهنې وزارت سرپرست او ورسره مل پلاوي ته د ښه راغلاست ترڅنګ، د يادې موضوع په اړه په تفصيل سره خبرې وکړې او ويې ويل: مدارس او ښوونځي يو له مهمو علمي او فرهنګي بنسټونو څخه دي او په هېواد کې یې د ښوونې او روزنې د بنسټونو پراختیا ته د پوهنې وزارت د مشرتابه له پاملرنې ستاینه وکړه.
غونډه دعائیې په لوستلو سره پای ته ورسېده.
