د کابل ولایت او ښار اړوندو ښوونځیو ته د مېزونو - څوکیو وېش لړۍ پیل شوه
په هغو مراسمو کې چې د کابل ولایت او ښار اړوندو ښوونځیو ته د مېزونو - څوکیو د وېش د پيل په مناسبت جوړ شوي وو، پکې د پوهنې وزارت د ښوونې او روزنې معین الحاج مولوي سخاءالله «سعید»، د خدماتو رئیس استاد حبیب الله «خالد»، د کابل ولایت او ښار د پوهنې ریاست مسئولینو او کارکوونکو برخه درلوده.
یاده پرتمینه غونډه د قرآن کریم د څو مبارکو آیتونو په تلاوت سره پيل شوه؛ ورپسې د پوهنې وزارت د خدماتو رئیس مېلمنو او ګډون والو ته د ښه راغلاست تر څنګ، د کابل ولایت او ښار اړوندو ښوونځيو ته د درسي توکو د وېش په تړاو معلومات وړاندې کړل، ویې ویل: د خدماتو ریاست له لوري په تېرو څو میاشتو کې ټولټال ۳۰۰۰ سېټه څوکۍ- مېزونه جوړ او د وېش لړۍ یې پیل شوه.
همدارنګه نوموړي څرګنده کړه، یاد ښوونیز توکي به د کابل ښار د ۱۶ ښوونیزو ناحیو او د کابل ولایت د ۱۴ ولسوالیو ښوونځيو ته ووېشل شي، چې په دې سره به دغه لړۍ تر ولایتونو هم و غځوي.
په ورته مهال د پوهنې وزارت د ښووني او روزنې معین په ټولنه کې د علم او پوهې اهمیت ته په اشارې سره وویل، چې د پوهنې وزارت مشرتابه د پوهنې د کیفیت لوړولو په برخه کې شپه -ورځ خپلې هلې ځلې جاري ساتي او په دې برخه کې خپلو هڅو ته لاپسې دوام ورکړي.
مراسم په دعائیې سره پای ته ورسېدل.
