په میدان وردګ ولایت کې د څه د پاسه ۴ مېلیونه افغانیو په ارزښت د یو ښوونځي نوې ودانۍ پرانیستل شوه
د میدان وردګ ولایت نرخ ولسوالۍ اړوند د دادل سهاک لومړني ښوونځي ودانۍ چې د یو همکار بنسټ له لوري د ۳ مېلیونه ۸۱۳ زره افغانیو په لګښت یې د جوړیدو چارې پیل شوې وې، نن د پوهنې ریاست مسئولینو او ځایي خلکو په حضور کې ګټې اخیستنې ته وسپارل شوه.
په هغه غونډه کې چې په همدې موخه جوړه شوې وه، د دغې ولسوالۍ د پوهنې مسئولینو په خپلو خبرو کې د یاد ښوونځي جوړېدل د پوهنې په پیاوړتیا او پراختیا کې خورا اغېزمن وبلل او څرګنده یې کړه چې له دې سره به د زده کوونکو ډېری ستونزې حل شي.
د یادولو ده، چې د ښوونځي دغه ودانۍ مجهز درسي ټولګي، عصري تشنابونه او د پاکو اوبو سیسټم له نورو اړینو ملحقاتو سره لري.
د سیمې خلکو هم د دغه ښوونځي پر پرانیستلو خوښي څرګنده کړه او د پوهنې وزارت له پاملرنې او کړنو یې مننه وکړه.
