د پوهنې وزارت د مقام د دفتر لوی رئیس لوګر ولایت ته په رسمي سفر ولاړ
د پوهنې وزارت د مقام د دفتر لوی رئیس الحاج مولوي شهاب الدین «ثاقب» د عمریه دیني مدرسې لپاره د دوه جرېبه ځمکې تثبیت لپاره، د لوګر ولایتي او پوهنې چارواکو سره د لیدنې په موخه یاد ولایت ته سفر وکړ.
همدارنګه نوموړي د لوګر ولایت له مقاماتو، پوهنې مسئولینو او نورو سیمه ییزو چارواکو سره په یوه غونډه کې څرګنده کړه: د افغانستان.ا.ا. د مشرتابه د عالي مقام د فرمان پر بنسټ او د پوهنې وزارت د رهبرۍ لارښوونې ته په پام سره، پرېکره وشوه چې د لوګر ولایت د میوو او سبزیو مارکېټ تر څنګ ۲ جرېبه ځمکې د عمریه دیني مدرسې جوړولو لپاره وقف شي او پرې د یادې مدرسې لپاره نوې ودانۍ جوړه شي.
د یادونې وړ ده، چې د عمریه دیني مدرسه د لوګر ولایت پوهنې ریاست په چوکاټ کې فعالیت کوي.
