د لغمان ولایت په یو شمېر ښوونځیو کې د څه کم نیم مېلیون افغانیو په لګښت ۲۵ سېټه «آی پاډ» ووېشل شول
د لغمان ولایت په یو شمېر ښوونځیو کې ښوونکو ته د تدریسي کچې لا ښه والي په موخه ټولټال ۲۵ سېټه «آی پاډ» توضېع شول.
پورته ذکر شوي برېښنایي وسایل چې د پوهنې وزارت سره د یوې همکارې ادارې له لوري د ۴۶۰ زره افغانیو په لګښت سره پېرودل شوي، د لغمان ولایت په مرکز مهترلام ښار کې د میاخېل لومړني ښوونځي، چهاردي منځني ښوونځي او د سلطان غازي ښوونځي ښوونکو ته ووېشل شول.
د یادو «آی پاډ سېټونو» د وېش په مراسمو کې، د پوهنې چارواکو له ښوونکو وغوښتل چې د خپلو ورځنيو تدریسي او اداري دندو ترسره کولو لپاره پورته ذکر شوي وسایل په اغېزمنه او ګټوره توګه وکاروي.
ورپسې د همدغو ښوونځیو ښوونکو د مننې ترڅنګ، پوهنې په بهیر کې د ټیکنالوژۍ رول ته په اشارې سره یادونه وکړه چې دوی به د هېواد د ماشومانو زدهکړې لپاره نه ستړي کېدونکې هلې ځلې وکړي.
