په جوزجان ولایت کې د تعلیمي مرکزونو جوړولو او بیارغونې عملي چارې پیل شوې
د جوزجان ولایت پوهنې رئیس الحاج مولوي لعل جان رشید په وینا، د درې بابه ښوونځیو جوړولو او بیارغونې پروژې د ۱۳۶ زره ۷۰۰ امریکایي ډالرو په لګښت د یوې همکارې ادارې په مالي ملاتړ سره پیل شوې دي.
د نوموړي په وینا، د شبرغان ښار په جلال آباد عالي لېسه کې، د شپږو درسي ټولګیو، دوو اداري خونو، لس غرفې تشنابونو، احاطوي دېوال، د اوبو څاګانو کیندلو او لمریزې برېښنا سیسټم پروژې، د ۱۰۳،۸۶۳.۵۹ امریکایي ډالرو په لګښت پیل شوې دي.
هغه زیاته کړه چې د شبرغان ښار د افشار خانه منځني ښوونځي لپاره د ۳۶۴ متره اوږد احاطوي دېوال جوړول هم د ۲۴،۳۸۲.۷۸ امریکایي ډالرو په لګښت پیل شوي دي.
همدارنګه، د یاد ولایت د آقچه ولسوالۍ په ینګي اریغ عالي لېسه کې، د څښاک پاکو اوبو یو حلقه څاه چې د لمریزې برېښنا سیسټم او د څښاک اوبو ذخیره هم لري، د ۸,۴۵۳.۶۳ امریکایي ډالرو په لګښت ترمیم او فعالېږي.
د جوزجان پوهنې رئیس ټینګار وکړ چې دا پروژې به د همکارو ادارو لخوا د لاسلیک شوي قرارداد پراساس په درېیو میاشتو کې بشپړې شي.
