پکتیکا ولایت کې د ۲.۴ مېلیونه افغانیو په لګښت د یو باب ښوونځي لپاره نوې تدریسي ودانۍ پرانیستل شوه
د پکتیکا ولایت یوسف خېل ولسوالۍ په زمری کوټ سیمه کې د خوشحال بابا ښوونځي نوې تدریسي ودانۍ، چې څه موده وړاندې یې رغنیزې چارې د پوهنې وزارت لخوا د عامو خلکو په مالي ملاتړ سره د ۲.۴ مېلیونه افغانیو په لګښت پیل شوې وې، اوسمهال بشپړه او په رسمي ډول د پوهنې مسئولینو، چارواکو، مشرانو او د سیمې د خلکو په حضور کې ګټې اخیستنې ته وسپارل شوه.
یاده ودانۍ چې شپږ درسي ټولګي او نور ټول اړین ملحقات لري، په اساسي او معیاري ډول جوړه شوې، ترڅو زدهکوونکي وکولی شي، په مناسب تعلیمي چاپېریال کې زدهکړې وکړي.
د یاد ولایت پوهنې رئیس مولوي عبدالوکیل خالد د دغې ودانۍ د پرانیستې په مراسمو کې وویل: موږ د زمری کوټ د خلکو له صادقانه همکارۍ څخه مننه کوو.
د نوموړي په وینا، د ولس دغه اقدام ښیي چې زموږ خلکو په پوره معنا د زدهکړې ارزښت درک کړی دی.
