د پوهنې وزیر د نتایجو او شهادتنامو او د معیاري ازموینو او ښوونیزو پایلو د ارزونې ریاستونو څخه رسمي لیدنې ترسره کړې
د پوهنې وزیر الحاج مولوي حبیب الله آغا، د تضمین کیفیت معین الحاج مولوي عبدالخالق صادق په ملتیا، د نتایجو او شهادتنامو ریاست له چارو څخه لیدنه وکړه. نوموړي د مراجعینو د عرایضو څانګه، د ښوونیزو بنسټونو د فارغانو آرشیف، د نتایجو د مهرولاک او کوډنګ سیسټم او د شهادتنامو د بانکي چارو بهیر وڅېړه او د مراجعینو ستونزې یې واورېدې.
د پوهنې وزیر د یاد ریاست مسئولینو ته د چارو د لا ښه تنظیم او معیاري خدمتونو د وړاندې کولو په موخه لازمې سپارښتنې ورکړې.
همدارنګه، د پوهنې وزیر الحاج مولوي حبیب الله آغا د یاد وزارت د معیاري ازموینو او د پایلو ارزونې ریاست څخه هم لیدنه وکړه او د کلنیو یوشان متمرکزه او معیاري ازموینو د پوښتنو د چاپ بهیر څخه لیدنه وکړه.
د یاد ریاست رئیس مولوي شمس الرحمن حماس په خپلو معلوماتو کې وویل چې معیاري ازموینه د کابل ښار د لسمو ټولګیو لپاره په څلورو مضمونونو اخیستل کېږي او څه باندې ۱۸۰ زره پارچې په محرمو خونو کې چاپېږي. دغه ازموینه د کټینګ له سیسټم څخه برخمنه ده چې د شفافیت په لوړولو کې مهم رول لري.
د پوهنې وزیر الحاج مولوي حبیب الله آغا د دواړو ریاستونو د چارو ستاینه وکړه او څرګنده یې کړه چې د پوهنې وزارت په تاریخ کې دا لومړی ځل دی چې ازموینې په یوشان متمرکزه او معیاري بڼه ترسره کېږي. هغه ټینګار وکړ چې د ازموینو معیاري کول د وزارت ستر هدف دی او د دغه بهیر د ملي کولو لپاره هر ډول لازم ملاتړ ته ژمن دي.
