په ميدان وردګ کې يوې لېسې لپاره د اداري ودانۍاو کتابتون بنسټ ډبره کېښودل شوه
د میدان وردګ ولایت سیدآباد ولسوالۍ اړوند باغک عالي لېسې لپاره د یو علم پرور شخص، ډاکټر بلال وردګ له لوري د ۴۰ زره امریکایي ډالرو په ارزښت د اداري ودانۍ او کتابتون بنسټ ډبره کېښودل شوه.
یاده ودانۍ به ۶ اداري خونې او د مطالعې لپاره یو کتابتون ولري، چې په جوړېدو سره به يې د ښوونځي اداري چارې لاتنظيم او د زدهکوونکو د مطالعې لپاره ښه زمینه برابره شي.
د پوهنې مسوولينو د یادې مرستې د قدردانۍ ترڅنګ وویل، چې د ۱۴۰۵ ښوونیز کال په لومړۍ ربعه کې د میدان وردګ ولایت خلکو له تعلیمي مرکزونو سره د ۹.۴ میلیونه افغانیو په ارزښت مرستې کړې دي.
د یادونې وړ ده، چې باغک عالي لېسه په ۱۴۰۴ لمريز کال کې د ۱.۲ میلیونه افغانیو په لګښت د پوهنې وزارت له بوديجې څخه بیا رغول شوې وه.
همدارنګه، ډاکټر بلال وردګ د سیدآباد ولسوالۍ په پټانخېلو کلي کې د ۱۵۰ زره امریکایي ډالرو په ارزښت د پټانخېلو منځني ښوونځي د جوړولو چارې هم پیل کړې دي.
