وزیر محترم معارف در جریان سفرش به ولایت پکتیا از شماری مراکز تعلیمی آن ولایت دیدار کرد.
محترم الحاج مولوی حبیب‌الله آغا، وزیر معارف کشور، که طی سفری به ولایت پکتیا عزیمت نموده است، در جریان این سفر به همراهی مولوی اول‌گل ایوبی، رئیس عمومی انکشاف مسلکی و نصاب وزارت معارف و الحاج مولوی عبدالقیوم فاروقی، رئیس معارف ولایت پکتیا، از مدرسه دینی عثمانیه، مدرسه دینی تحفیظ‌القرآن و لیسه تجربوی شهر گردیز، مرکز آن ولایت بازدید و بررسی به عمل آورد.
وزیر محترم معارف ضمن نشست های با معلمین، مهتممین و پرسونل مراکز تعلیمی مذکور، شاگردان را معماران آینده افغانستان دانسته، وضعیت شاگردان و طالب‌العلمان را نیز ارزیابی نمود و استعدادهای آنان را مثبت تلقی نمود.
وزیر معارف کشور به شاگردان، استادان و سایر مسئولین توصیه کرد که با توجه به تجارب گذشته، باید بر ظرفیت‌های خود بیشتر کار کرده و از آن‌ها به گونه سالم بهره‌برداری نمایند. وی یادگیری علوم دینی و عصری را برای همه ضروری دانست و تأکید کرد که باید هر آنچه برای دفاع از کشور نیاز است، مهیا شود.
محترم مولوی حبیب الله آغا، اجرای لایحه یونیفورم را یک گام مهم خوانده و افزود که این لایحه در شمار زیادی از مکاتب ولایت پکتیا عملی گردیده است.
