یوې افغانې میرمنې د لوګر له یوه ښوونځي سره مرسته کړې ده
د پوهنې وزارت لوګر: د لوګر ولایت د نجونو له یوه ښوونځي سره د یوې افغانې میرمنې له لوري د ۳۸ قلمه بیلا بیلو اړینو توکو مرسته شوې ده.
دغه مرسته د زهرې باقي په نوم یوې امریکایي میشتې افغانې میرمنې کړې ، چې ۵ زره امریکایي ډالره ارزښت لري.
په دې مرسته کې درسي توکي، د زده کوونکو جامې، ټیکري، بوټونه، د کتابونو بیکونه، د بریښنا جنراتور، نیالګي، د اوبو واټر پمپ او د اوبو ایستلو سیستم وسایل شامل دي.
مرسته شوي نیالګي د ښوونځي په انګړ کې کېنول شوي دي، چې میوه لرونکي، غیر میوه لرونکي او زینتي نیالګي دي.
د دغې مرستې تر څنګ یاد ښوونځي ته د واټر پمپ پر مټ د اوبو ایستلو سیستم هم جوړ شوی، چې د ښوونځي ټولو برخو ته اوبه ورکوي.
دغه راز د ښوونځي انګړ د کنډوکپر برخې هم د یادې میرمنې په مرسته هوارې شوي او هم ورته پلي لارې جوړې شوې دي.
د لوګر د پوهنې سرپرست رئیس نثار احمد سیدي د یادې میرمنې په شوې مرستې خوښي څرګنده کړه او دایې لویه مرسته وبلله.
هغه زیاته کړه، چې په دې مرستې سره د یاد ښوونځي د سلګونو زده کوونکو د درسي توکو، د ښوونځي جامو، ټیکریو او بوټونو ستونزه حل شوې ده.
د یادونې وړده، چې دغې میرمنې په تېرو کلونو کې هم د یاد ښوونځي له ښوونکو او زده کوونکو سره د درسي توکو مرستې کړې دي.
