په ملي شورا او د سولې مشورتي لویه جرګه کې د کندز ولایت له استازو سره غونډه
د پوهنې وزارت، کابل: د پوهنې وزارت سرپرستې آغلې رنګینې حمیدي، په ملي شورا او د سولې مشورتي لویه جرګه کې د کندز ولایت له یو شمیر استازو سره د پوهنې په وزارت کې وکتل.
د کندز ولایت استازو په دغه ولایت کې د پوهنې د پرمختګونو او ننګونو په اړه، په شمول د مسلکي ښوونکو نشتون، د زده کړې آسانتیاوې، د کتابونو نشتون، د ښوونکو د ظرفیت لوړول، عامه پوهاوی او یو شمیر نورو نیمګړتیاوو په هکله خبرې وکړې او د پوهنې وزارت له مشرتابه څخه یې وغوښتل چې دا ستونزې حل کړي.
د پوهنې وزارت سرپرستې د کندز ولایت له استازو څخه مننه وکړه او زیاته یې کړه چې د پوهنې وزارت دنده لري چې د هیواد وګړو ته د مساوي او عادلانه زده کړې برابري کړي.
د پوهنې وزارت سرپرستې آغلې رنګینې حمیدي په کندوز ولایت کې د ښوونې او روزنې په برخه کي د ننګونو د حل ژمنه وکړه او ویې ویل چې له زده کړې بې برخې پرتې سیمې د پوهنې وزارت د رهبرۍ تر ځانګړې پاملرنې لاندې دي او هڅه کوي چې د هیواد ماشومانو، هلکانو او نجونو لپاره مناسب او خوندي تعلیمي فرصتونه د هیواد په ټولو برخو کي برابر کړي.
د پوهنې وزارت سرپرستې د هیواد په تعلیمي برخو کې د میرمنو د حضور په تقویه کولو باندې ټینګار وکړ او زیاته یې کړه چې د پوهنې وزارت هوډ لري چې د حکومت د مشرتابه د ژمنو سره سم په دې وزارت کې د ښځو په شتون باندي لا ډیر کار وکړي.
