د بادغيس ولايت پوهنې رياست ته نوى رئيس ور وپيژندل شو او په دندې يې پيل وکړ
د هغې غونډې په ترڅ کې چې د ولايتي چارو د انسجام عمومي رئيس دل آقا صوفي زاده، مرستيالانو، امرانو او د ياد ولايت د بيلابيلو برخو نورو کارکوونکو هم ګډون درلود، د ياد ولايت د پوهنې رياست نوى رئيس، محمد آصف فولاد، د پوهنې رياست پرسونل او کارکوونکو ته ور وپيژندل شو او دنده يې رسمأ پيل کړه.
په پيل کې د بادغيس د پوهنې رياست تدريسي مرستيال، له مرکز څخه راغلي پلاوي ته ښه راغلاست وويل، او ترڅنګ يې د ياد رياست د کارونو او فعاليتونو لنډ راپور وړاندې کړ او په ياد رياست کې يې د شته ستونزو او ننګونو يادونه وکړه، د وزارت له رهبرۍ يې څخه يې د ستونزو د حل غوښتنه وکړه.
وروسته دل آقا صوفي زاده، محمد آصف فولاد چې په ياد ولايت کې د پوهنې د رياست د نوي رييس په توګه ګمارل شوى، د غونډې ګډونوالو ته ور وپيژنده.
نوموړي زياته کړه چې په دولتي ادارو کې د کادرونو په ګمارنه کې ښايسته سالاري يو مهم اصل دى چې په دې سره به وړ کسان د آزادې سيالۍ له لارې غوره کيږي.
د ولايتي چارو د انسجام عمومي رئيس، له نوي رئيس څخه وغوښتل څو د پوهنې وزارت د پروګرامونو او موخو په پلي کولو کې پوره هڅې وکړي او په ټولو ولسواليو کې د ښوونې او روزنې په برخه کې انډول په پام کې ونيسي.
په پاى کې محمد آصف فولاد د پوهنې وزارت له رهبرۍ څخه مننه وکړه چې نوموړى يې د ښوونې او روزنې په برخه کې د چارو سمبالولو وړ وګڼه او همداراز نوموړي ژمنه وکړه چې په پوره ځواک سره به د پوهنې وزارت موخې پلې کوي.
نوموړي له اولسونو او د ياد رياست له کارکوونکو وغوښتل چې د شته پروګرامونو د پلي کولو په برخه کې له دوى سره مرسته وکړي.
