د بلخ له پوهنې ریاست څخه خبرونه
په مزارشريف ښار کې د امام مسلم له مدرسې څخه ۷۰ تنه فاضلان د حدیثو او ۱۷ تنه د قرانکریم د حفظ له دروې څخه فارغ شول د فاضلانو د فارغت په مناسبت یوه لویه پرتمینه غونډه جوړه شوې وه، چې په دې غونده کې د ټولو ادارو استازو، نظامي چارواکو او د سیمې خلکو ګډون درلود. د بلخ د پوهنې رئیس مولوي عبدالجلیل شهیدخېل د دغې دورې فارغانو ته د مبارکۍ ویلو پرمهال د پوهنې د سکتور د ودې په برخه کې د علماوو او خلکو څخه د مرستو غوښتنه وکړه.
همدا راز د بلخ ولايت د پوهنې په رياست کې د مجاهدينو د سویې ازموینې د اخیستلو او د فورمونو د وېشلو په موخه غونډه جوړه شوه. په دې غونډه کې د ازموينې د طرزالعمل، د کميسيون د غړو د ټاکلو او د مجاهدينو د فورمونو د وېشلو نېټه وټاکل شوه. د پوهنې وزارت د لارښوونې له مخې هغه مجاهدین چې په تېرو شلو کلونو کې په جهاد کې د ګډون له امله له زده کړو څخه محروم شوي دي او له زده کړو سره لیوالتیا لري د لسم او یوولسم ټولګي د سویې ازموینه دې ترې واخیستل شي او په ښوونځیو کې دې شامل شي.
د بلخ د پوهنې ریاست څخه په یو بل خبر کې ویل شوي، چې د نهرشاهي ولسوالۍ د بابا یادګار ولسوالۍ د آغا محمد فیضي د لومړني ښوونځي د بیارغونې چارې د بلخ ولایت د پوهنې ریاست د مشرتابه پلاوي او د اکتید موسسې د استازو په حضور کې ګټې اخیستنې ته وسپارل شوې.
د بلخ ولايت د پوهنې رئيس الحاج مولوي عبدالجليل شهیدخېل د پوهنې په برخه کې د اکتيد ادارې له اغېزناکو همکاريو څخه مننه وکړه او د پوهنې په نورو برخو کې يې د دغې ادارې د دوامداره مرستو غوښتنه وکړه.
همدارنګه د بلخ ولسوالۍ د پوهنې د آمر مولوي زړګی فیضاني په مشرۍ د دغه آمریت اړوند د ښوونځیو د مدیرانو او اداري کارکوونکو لپاره د نوي تعلیمي کال د پیل په موخه د چمتووالي غونډه جوړه شوه. او د ښوونیزو خدمتونو د وړاندې کولو او د لا اغیزمنتیا د رامنځته کولو په موخه ګډونوالو لازمې لارښوونې وشوې.
په دې وروستيو کې د چهاربولک ولسوالۍ د پوهنې آمر قاري جمشيد ابوسهيل او د يادې ولسوالۍ د تعلیمي څارنې آمر محمد عظيم عمري د بي بي سميه (رض) د ښځينه مدرسې له تدريسي بهير څخه ليدنه وکړه.
د یادونې وړ ده، چې په ياد شوي مدرسه کې ۱۸۰ تنه زده کوونکي په زده کړه بوخت دي.
