له ولایتونو څخه د پوهنې خبرونو لنډیز
ننګرهار
د ننګرهار ولایت سرخرود ولسوالۍ اړوند د بړینې منځني ښوونځي یوه ښوونکي له خپل شخصي ملکیت څخه، د یاد ښوونځي په مستحقو زده کوونکو یو اندازه کتابچې او قلمونه ووېشل.
همدارنګه:
د ننګرهار ولایت د سلطانپور عالي لېسې استادانو په خپلو شخصي پیسو د یادې لېسې ودانۍ بیاځلې ورغوله.
د یو بل خبر له مخې:
د پوهنې یوهمکار بنسټ په ننګرهار ولایت کې ۱زره۱۲۰ تنو زده کوونکو ته جامې او نور ژمني توکي چمتو کړل.
د یاد ولایت پوهنې ریاست د همکارو بنسټونو او د دغه ولایت د علم پاله ولس له همکارۍ خوښي څرګنده کړه.
کابل ښار
د کابل ښار پوهنې ریاست اداري غونډه، د یاد ریاست د مسئولینو او د ښوونیزو ناحیو د آمرینو په ګډون جوړه شوه.
په یاده کتنه کې د تېر کال پر کړنو، لاسته راوړنو او ننګونو خبرې وشوې او د راتلونکي لمریز کال د ښوونیزو پلانونو او پروګرامونو په اړه د ګډون والو ترمنځ نظرونه تبادله شول.
ارزګان
د ارزګان ولایت پوهنې ریاست د یاد ریاست په څانګو کې د ساینس مدیریت اړوند د ۱۲ خالي بستونو د ډکولو په موخه، له نوماندانو څخه رقابتي آزموینه واخیسته.
