په غزني ولایت کې د مدارسو او ښوونځیو د زدهکوونکو ترمنځ "د امام اعظم ابوحنیفه رحمه الله ژوند" په اړه علمي سیالي ترسره شوه
د غزني ولایت پوهنې ریاست د یاد ولایت د مدارسو او ښوونځيو د ۴۵۰۰ تنو طلابو او زدهکوونکو ترمنځ د اسلامي امت لپاره د امام ابوحنیفه رحمه الله د ژوند، پوهې او خدمتونو په اړه یوه لویه علمي سیالي ترسره کړه.
په همدې مناسبت په جوړه شوې غونډه کې، د یاد ولایت پوهنې رئیس محترم الحاج مولوي میر نصیر احمد حسیني وویل چې، د دې پروګرام موخه د امام ابوحنیفه رحمه الله د علمي خدمتونو معرفي کول، د لویو علماءکرامو مقام ته درناوی او د اسلامي فقهې د بنسټونو پېژندل دي.
نوموړي زیاته کړه چې د امام ابوحنیفه رحمه الله علمي ښوونځی نه یوازې د اسلامي امت لپاره د فقهې بنسټ اېښودونکی دی؛ بلکې په امت کې یې د فکر، استدلال او اجتهاد روح هم ژوندی ساتلی دی.
