د ښوونې او روزنې معینیت لخوا د کابل ښار په استقلال عالي لېسه کې د څارنې او ارزونې بهیر ترسره شو
د ښوونیز کال له پیل سره سم، د افغانستان اسلامي ا/مارت د پوهنې وزارت د ښوونې او روزنې معینیت له لوري د ښوونځیو او ښوونیزو مرکزونو د اداري او تدریسي چارو د سمون، لارښوونو او لاښهوالي په موخه د څارنې لړۍ پیل شوې ده.
په همدې لړ کې د ښوونې او روزنې محترم معین شیخ مولوي عبدالمالک حقاني، د خپل تخنیکي ټیم په ملتیا، د کابل ښار دویمې ښوونیزې حوزې اړوند له استقلال عالي لېسې څخه ناڅاپي لیدنه ترسره کړه.
د یادې لیدنې په ترڅ کې، د لېسې له اداري مسئولینو سره کتنه وشوه او د ښوونځي اداري چارې له نږدې وکتل شوې.
همدارنګه، محترم معین صاحب او ورسره تخنیکي پلاوي په نمونوي ډول له یو شمېر درسي ټولګیو څخه لیدنه وکړه، د تدریس بهیر یې وڅاره او د زدهکوونکو د علمي کچې او استعدادونو ارزونه یې ترسره کړه.
په دې بهیر کې، د تدریسي کیفیت، د درسي نصاب تطبیق، د زدهکوونکو ګډون او د ښوونکو د تدریسي میتودونو څرنګوالی په دقت سره وڅارل شو. دغه راز، د ښوونځي د چاپېریال، نظم، حاضرۍ او اداري همغږۍ وضعیت هم تر څېړنې لاندې ونیول شو.
د لیدنې په پای کې، د ښوونې او روزنې محترم معین د ښوونکو، زدهکوونکو او اداري مسئولینو سره خبرې وکړې او د شته ستونزو د حل، د تدریسي کیفیت لوړوالي او د ښوونیز بهیر لا پیاوړتیا لپاره یې لازمې لارښوونې وکړې.
نوموړي ټینګار وکړ چې د ښوونیز نظام د پیاوړتیا لپاره دا ډول څارنې ډېرې مهمې دي او باید په دوامداره توګه ترسره شي، ترڅو د ښوونې او روزنې کیفیت لوړ او ستونزې پر وخت تشخیص او حل شي.
د یادونې وړ ده چې د پوهنې وزارت د ښوونې او روزنې معینیت له لوري د ښوونځیو د څارنې او ارزونې دغه لړۍ به د هېواد په بېلابېلو ولایتونو او ښوونیزو حوزو کې په منظم ډول دوام ولري.
