په لوګر کې د ۱۳۰ ښوونکو د وړتیا لوړونې روزنه پیل شوه
د لوګر ولایت مرکز پل علم اړوند د نجونو او هلکانو د ۴۶ ښوونځیو د ۱۳۰ نارینه او ښځینه ښوونکو د وړتیا لوړولو روزنه پیل شوه.
د یادې روزنې د پیل په مراسمو کې د پوهنې ښاري آمر مفتي مولوي ضیاء الحق ملنګ، د آی، آر، سي مؤسسې د پوهنې برخې مسؤل محمد منیر سمسور او ښوونکو برخه اخیستې وه.
دا روزنیز پروګرام د پوهنې ریاست په پوره همغږۍ د آی، آر، سي مؤسسې له خوا پیل شوه، چې لس ورځې به دوام وکړي.
په یاده روزنه کې ښوونکو ته په ښوونځیو کې د درسي کیفیت د لوړوالي په مؤخه د پوهنې وزارت د تعلیمي نصاب د تدریس غوره لارې چارې ور ښودل کېږي، چې په دې روزنې سره به د ښوونځیو درسي کیفیت نور هم لوړ شي.
په نوموړي روزنیز پروګرام کې ۶۰ نارینه او ۷۰ ښځینه ښوونکو برخه اخیستې ده ، چې ټول د مرکز پل علم اړوند د ۴۶ ښوونځیو ښوونکي دي.
د یادونې وړده،چې د لوګر د ښوونځیو ښوونکو ته له دې مخکې هم د ظرفیت لوړولو په برخه کې ورته روزنیز پروګرامونه جوړ شوي، چې د ښوونکو د ظرفیتونو په لوړولو کې ډېر ګټور تمام شوي.
