د دعوت او ارشاد ریاست په هڅو سره په مرکز او ولایتونو کې د پوهنې منسوبینو دیني او فقهي پوهې کچه لوړه شوې ده
د پوهنې وزارت د دعوت او ارشاد ریاست په نوښت او د امر بالمعروف، نهې عن المنکر او شکایتونو اورېدلو وزارت په همغږۍ، په مرکز او ولایتونو کې د تعلیمي ادارو منسوبینو ته د دیني زده کړو ځانګړي پروګرامونه تنظیم شوي، چې له امله یې د کارکوونکو په علمي او دیني پوهه کې د پام وړ زیاتوالی راغلی دی.
د یادو پروګرامونو اساسي موخه داده چې د پوهنې منسوبین د اسلامي ارزښتونو او دیني اصولو سره لا ښه اشنا شي او د زدهکوونکو، والدینو، ټولنې له غړو او مراجعینو سره په چلند کې مثبت بدلون راولي، چې د دعوت او ارشاد ریاست له لوري جوړه شوې کړنلاره او دیني نصاب د همدې موخې لپاره ځانګړی شوی ده.
د پوهنې یو شمېر منسوبین وایي، دوی ته هره ورځ د دعوت او ارشاد ریاست مسئولینو او علماءکرامو له خوا دیني درسونه ورکول کېږي او د دیني علومو په برخه کې یې پراخ معلومات ترلاسه کړي دي. همدارنګه دوی زیاتوي چې دغه زدهکړې نه یوازې د هغوی په مسلکي او اخلاقي چلند اغېز لري، بلکې په ټولنه کې د دیني ارزښتونو په ترویج کې هم مهم او بنسټیز نقش لري.
د دعوت او ارشاد ریاست مسؤلین وایي، یاد علمي او روزنیز پروګرامونه به دوام ومومي او هڅه کوي چې دغه برخه لاپسې پراخه کړي.
خلک او علماءکرام هم د دعوت او ارشاد ریاست هڅې ستایي او د ورته پروګرامونو پر دوام یې ټینګار وکړ.
