د غزني ولایت په خواجهعمري ولسوالۍ کې د محمدیه دیني مدرسې نوې ودانۍ پرانیستل شوه
د غزني ولایت په خواجهعمري ولسوالۍ کې د محمدیه دیني مدرسې نوې ودانۍ چې د جوړولو کارونه یې څو میاشتې مخکې د یو خیریه بنسټ په همکارۍ پیل شوي وو، اوس بشپړ او د پوهنې مسئولینو، علماءکرامو او د ځایي خلکو په ګډون د یو لړ ځانګړو مراسمو په ترڅ کې افتتاح او ګټې اخیستنې ته وسپارل شوه.
د یاد ولایت پوهنې رئیس محترم الحاج مولوي میر نصیر احمد حسيني وویل: دغه ودانۍ چې ارزښت یې شاوخوا ۳.۷ میلیونه افغانۍ دی، په یوه پوړ کې جوړه او پکې ۶ تعلیمي ټولګي، یوه اداري خونه، د اوبو او سولر برېښنا سیسټمونه شامل دي.
د یادونې وړ ده چې پورته ذکر شوې ودانۍ د ۲۵۰ څخه د زیاتو طلابو لپاره یو مناسب او خوندي تعلیمي چاپېریال برابروي.
