د لاس مینځلو نړیواله ورځ د "پاک لاسونه" تر شعار لاندې ولمانځل شوه
پوهنې وزارت، کابل: د پوهنې وزارت د عمومي زده کړو معین ښاغلي ډاکټر محمد ابراهیم شینواري د پوهنې وزارت د بدني روزني ریاست په نوښت په جوړو شویو مراسمو کې ګډون وکړ او ویي ویل: ۱۴ سوه کاله د مخه پاکوالي ته د اسلام په مقدس دین کې ځانګړی ځای درلود چې، نن ورځ انسانانو دا حقیقت درک کړی چې د ناروغیو د مخنیوي یوه لاره د حفظ الصحې ساتل او د لاسونو مینځل دي.
د پوهنې وزارت د عمومي زده کړو معینیت پر زده کوونکو غږ وکړ چې د خپل ځان او کورنۍ روغتیا ساتلو ته جدي پاملرنه وکړي، او د ښوونکو لپاره هم اړینه ده چې په دوامداره توګه د زده کونکو پاکوالي ته پاملرنه وکړي او ويي هڅوي چې خپل لاسونه په تودو اوبو او صابون ومینځي.
وروسته د روغتیا وزارت د پلان او پالیسۍ رییس شفیق الله همت هم په دي اړه خبرې وکړې او ویې ویل: احصایه شتون لري چې په نړۍ کې هر کال ۱.۷ ملیارده ماشومان د اسهال په ناروغۍ ، ۵۰۰ ملیونه ماشومان د تنفسي ناروغیو او ۱۶۵ ملیونه ماشومان په سوی تغذي اخته کیږي چې دا ډیر لوی رقم دي او دا ناروغۍ معمولا په ټولنه کې د حفظ الصحې نشتوالي له امله خپریږي، نو د صابون او اوبو سره د لاسونو مینځل د روغتیا تضمین کولو یوه لاره ده.
غلام قادر آزاد د کلیو د بیارغونې او پراختیا وزارت استازی، مصطفی بن مسعود د یونیسف استازی، حمیده پکتیاني د ښځو چارو وزارت استازې ، هر یوه په اوبو او صابون سره د لاسونو مینځل او پاکوالي په اړه خبرې وکړې او دوی د ناروغیو په مخنیوي کې له پوهنې وزارت سره پر خپلې همکارۍ ټینګار وکړ.
مراسم د سردار کابلي عالي لیسې د مدیرې نسرین سلطاني په وینا ، د لاسو د مینځلو نندارتون او یو شمیر زده کونکو ته د عمومي زده کړو معین لخوا د ډالیو ویشلو سره پای ته ورسیدل.