د هرات ولایت پوهنې کارکوونکو لپاره "د اداري پروسو ساده کولو " په اړه ورکشاپ جوړ شو
د چارو اداري لوی ریاست له لوري، د اداري پروسو ساده کولو د پلانونو د تشرېح کولو او د پوهنې کارکوونکو ته د نويو اداري مېتودونو سره د بلدتیا لپاره، "د اداري پروسو ساده کولو " په نوم یو ورځنی ورکشاپ ترسره شو.
لومړی د یاد ولایت پوهنې رئیس محترم مولوي رحمتالله جابر ګډونوالو د ښه راغلاست پرمهال وویل چې د اداري چارو ساده کول د دندو ښه والي او خلکو ته د خدمتونو د ګړندي کولو لپاره یو له اساسي اړتیاوو څخه دي او زیاته یې کړه چې د دې پروسې پلي کول کولی شي د اداري کارونو پېچلتیا کمولو، روڼتیا زیاتولو او د پوهنې خدمتونو وړاندې کولو په برخه کې د پام وړ پرمختګونه رامنځته کړي.
ورپسې د اداري اصلاحاتو او ملکي خدمتونو ساده کولو مرستیال مفتي محمد فريد غزنوي هم د دې پروسې د اهمیت او اهدافو په اړه هر اړخیز معلومات وړاندې او د ګډونوال رول یې د هغو په بریالیتوب کې حیاتي وباله.
