د پوهنې وزارت د دعوت او ارشاد ریاست مشورتي ناسته د یاد وزارت د مرکزي څانګو له مسئولینو سره ترسره شوه
د پوهنې وزارت د دعوت او ارشاد ریاست مشورتي ناسته، د خپلو اړوندو اداري پلانونو او پروګرامونو د تطبیق او مشورو په موخه، د یاد وزارت د مرکزي څانګو له مسئولینو سره ترسره شوه.
غونډه د قران عظیم الشان د څو مبارکو آیتونو په تلاوت سره پیل شوه او ورپسې د پوهنې وزارت د دعوت او ارشاد رئیس مولوي جمعه خان سروري، د ټولنې په اصلاح او پرمختګ کې د فقهې او دیني مسائلو رول او اهمیت ته اشاره وکړه او ویې ویل: یاد رياست غواړي، تر څو په دې برخه کې يو پروګرام جوړ او په دغه وزارت کې د خپلو همکارانو په وړاندې خپل ديني مسئوليتونه سرته ورسوي.
نوموړي د خپلو خبرو په دوام، د دعوت او ارشاد ریاست له مسئولینو او د پوهنې له کارکوونکو وغوښتل، چې د اسلام د سپېڅلي دین د لارښوونو او اسلامي مسایلو په اړه د لا زیاتو ښوونیزو پروګرامونو په لاره اچولو سره خپلې هلې ځلې له پخوا څخه زیاتې او د عامو خلکو د پوهنې او فکري بډاینې په برخه کې خپله ونډه ادا کړي او پرېنږدي چې زموږ اسلامي ټولنه او نوی نسل د پردیو فرهنګونو تر یرغل لاندې راشي.
ورپسې د دعوت او ارشاد ریاست څو تنو مسئولینو خپل رغنده نظريات او وړانديزونه د دعوت او ارشاد رئیس ته وړاندې کړل، چې د غونډې د ګډون والو له لوري وستايل شول.
غونډه د دعائیې په لوستلو سره پای ته ورسېده.