د پوهنې وزارت د معیاري آزموینو او ښوونیزو پایلو ارزونې ریاست د ارزونې ټېمونو د هېواد ۱۰ ګرمو سیمو او ولایتونو ته رسمي سفرونه پیل کړل
د پوهنې وزارت د کیفیت تضمین معینیت د ارزونې ټېمونه چې په تشکیل کې یې د معیاري آزموینو او ښوونیزو پایلو ریاست متخصصین او کارپوهان هم شامل دي، د اصول صنفي ټولګیو د ښوونیزې کچې ارزونې په موخه، د هېواد لسو ګرمو سیمو او ولایتونو ته خپل سفرونه پیل کړل.
د مهالوېش سره سم، پلان شوې ده چې پورته ذکر شوي ټېمونه، به د یادو ولایتونو د مرکز او ولسوالیو اړوندو ښوونځیو ۳۰ تنه زده کونکي د ریاضي او لوستلو په برخه کې وارزوي.
هېره دې نه وي، چې د معیاري آزموینو او ښوونیزو پایلو ارزونې رئیس مولوي شمس الرحمن حماس د کونړ، ننګرهار او لغمان ولایتونو ته د خپل رسمي سفر پر مهال، د همدې ارزونو له پروسې څخه لیدنه وکړه.
نوموړي په خپله وینا کې د اصول صنفي زده کونکو ارزونه د دوی د زده کړې کیفیت لاښه کولو په برخه کې اغېزمنه وګڼله او د پورته ذکر شویو ټېمونو له غړو څخه یې وغوښتل، چې خپلې ارزونې په دقت او معیاري ډول ترسره کړي.
