د پوهنې وزارت د ښوونیز نصاب او د ښوونکو د مسلکي پراختیا لوی رئیس بلخ ولایت ته په رسمي سفر ولاړ
د پوهنې وزارت د ښوونیز نصاب او د ښوونکو د مسلکي پراختیا لوی رئیس الحاج مولوي اول ګل ایوبي او ورسره مل پلاوی، د خپل رسمي سفر په ترڅ کې بلخ ولایت ته ورسېد.
په پیل کې د پوهنې وزارت د ښوونیز نصاب او د ښوونکو د مسلکي پراختیا لوی رئیس د بلخ ولایت له پوهنې رئیس الحاج مولوي عبدالجلیل شهید خېل سره په پوهنیزو موضوعاتو بحث او تفصیلي خبرې وکړې.
نوموړي یاد ولايت ته د خپل سفر اساسي موخه د نصاب او د ښوونکو د مسلکيتوب په برخو کې د پوهنیزو اړتياوو څېړل ياد کړل او د دغه ولايت د ښوونځيو د ښوونکو د وړتیاوو پر لوړولو يې هم ټينګار وکړ.
ورپسې د بلخ ولایت پوهنې رئیس یاد پلاوي ته د ښه راغلاست پر مهال، په دغه ولایت کې د ښوونکو د وړتیا لوړونې او مسلکي کولو په برخه کې د پوهنې وزارت اغېزمن پلانونه وستایل او په پوهنیزه برخه کې یې د پوهنې وزارت له مشرتابه څخه د لازیاتو همکاریو غوښتنه وکړه.
ياد پلاوي د ښوونکو د وړتیا لوړونې له هغه ۱۲ ورځني روزنیز سيمينار څخه هم ليدنه وکړه، کوم چې د یو همکار بنسټ په مالي ملاتړ جوړ شوی ؤ.
