د پوهنې وزارت سرپرست د يوه رسمي سفر په ترڅ کې بلخ ولایت ته ولاړ
د پوهنې وزارت سرپرست الحاج مولوي حبیب الله آغا په مشرۍ يو پلاوی د یو شمېر ښوونيزو پروژو د پرانيستلو او تعليمي چارو د کتنې په موخه، بلخ ولایت ته ولاړ.
په پیل کې د پوهنې وزارت سرپرست، په داسې حال کې چې د بلخ ولایت پوهنې رياست مشرتابه پلاوی هم حاضر وو، د ياد ولایت له والي الحاج محمد یوسف وفا سره وکتل.
دواړو لورو د یاد ولایت ښوونیز او روزنیز وضعیت د څېړلو په تړاو د نظرونو تبادله وکړه.
د پوهنې وزارت سرپرست ياد ولایت ته د خپل سفر په ترڅ کې، د یو شمېر ښوونځیو د نویو ودانیو د پرانيستلو، د پوهنې د وضعیت د ارزونې، د ياد وزارت د پلانونو او پروګرامونو په اړه تفصيلي خبرې وکړې.
په ورته مهال نوموړي په ټول هېواد کې د متوازنو ښوونيزو خدمتونو د پیاوړتیا او پراختیا په اړه د بلخ والي او مشرتابه ته معلومات ورکړل.
بل پلو د یاد ولایت والي د پوهنې وزارت سرپرست او ورسره مل پلاوي ته د ښه راغلاست ويلو ترڅنګ، د پوهنې وزارت د ټولو ښوونيزو پلانونو د پلي کولو په برخه کې له خپل لوري د همکارۍ ډاډ ورکړ.
