د پوهنې وزارت سرپرست وزیر د یاد وزارت د نظارت او ارزیابي ریاست د فعالیتونو راپور واورېد
د پوهنې وزارت سرپرست وزیر الحاج مولوي حبیب الله آغا د یوې غونډې په ترڅ کې د یاد وزارت د نظارت او ارزیابي ریاست د فعالیتونو راپور واورېد.
هغه غونډه چې په همدې مناسبت د تضمین کیفیت معینیت د غونډو په تالار کې جوړه شوې وه، د یاد وزارت د تضمین کیفیت سرپرست معین الحاج مولوي عبدالخالق صادق، د وزارت ځینو مرکزي رئیسانو، د مرکزي ریاستونو استازو او د نظارت او ارزیابي ریاست مسلکي کارمندانو او متخصصینو پکې ګډون درلود.
په یاده غونډه کې لومړی د پروجکټور په وسیله هیواد د څلور دېرشو ولایاتو د نظارت او ارزیابي تفصیلي راپور د مجلس ګډون والو ته وړاندې شو او وروسته د ولایاتو په تعلیمي بهیر کې د موجودو ستونزو لکه تقاعد ته د کاندیدو کارمندانو او ښوونکو عدم تقاعد، د ښوونکو له لوري په خپلو اړوندو تخصصي مضامینو کې عدم تدریس، په تشکیلاتو کې عدم توازن، له پوهنې وزارت سره د هوکړه لیکونو له لاسلیک کولو پرته د ځینو کورنیو او بهرنیو خیریه مؤسساتو او بنسټونو فعالیتونه او د یادو ستونزو د حل لارو په هکله تفصیلي بحثونه وشول.
په یاده غونډه کې د پوهنې سرپرست وزیر الحاج مولوي حبیب الله آغا او د تضمین کیفیت سرپرست معین الحاج مولوي عبدالخالق صادق ویناوې وکړې. نوموړیو په خپله ویناوو کې د نظارت او ارزیابي ریاست د مسئولینو او کارمندانو هلې ځلې وستایلې او ژمنه یې وکړه چې له اړوندو مرکزي او ولایتي ریاستونو سره په هم غږي کې به یادو ستونزو ته د حل مناسبې او معقولې لارې لټوي او په دې برخه کې به پوره هڅه او هاند کوي.
