د پکتیکا ولایت د یو شمېر ښوونځیو د ۱۷۰۰ تنو زده کوونکو لپاره د وړیا زده کړو کورسونه جوړ شول
د پکتیکا ولایت پوهنې رئیس مولوي عبدالوکیل خالد په وینا، د ارګون ولسوالۍ اړوند علي خېلو د سیمې ځوانانو او د محصلینو اتحادیې له لوري، د ۱۷۰۰ تنو زده کوونکو په ځانګړې توګه یتیمو او بې وزله ماشومانو لپاره په وړیا ډول ژمني ښوونیز کورسونه پرانیستل شول.
نوموړي د ارګون ولسوالۍ د اوسېدونکو د دغه نېک اقدام او علم پروره کړنو د هرکلي ترڅنګ، له نورو هم وغوښتل، چې د هېواد د پوهنیز نظام په بډاينه او د زده کوونکو په ځانګړي ډول د ژمنيو رخصتيو پر مهال د زده کړو د کچې د لوړولو په برخه کې مادي او معنوي مرسته وکړي.
د زده کوونکو د والدینو په استازیتوب یو شمېر کسانو د پوهنې وزارت له پروګرامونو خپل ملاتړ څرګند او ددماشومانو لپاره یې د وړیا کورسونو په جوړولو کې د علم دوسته شخصیتونو کړنې وستایلې.
د يادونې وړ ده، چې په همدغو کورسونو کې د نوم ليکنې لړۍ روانه ده او ورځ تر بلې د ګډون والو شمېر مخ پر زياتېدو دى.
