د پکتیکا ولایت په یوه عالي لېسه کې د نويو درسي ټولګیو د بنسټ ډبره کېښودل شوه
د پکتيکا ولايت پوهنې رئيس مولوي عبدالوکيل خالد د ياد ولايت يوسف خېل ولسوالۍ د پوهنې مسئولينو، علماوو، سپين ږيرو او د خلکو د استازو په يوه غونډه کې د خوشحال بابا په لېسه کې د ۸ بابه درسي ټولګيو د بنسټ ډبره کېښوده.
ياد درسي ټولګي د علم پروره خلکو په مرسته چې ټولټال درې میلیونه افغانۍ کېږي، جوړېږي.
د ياد ولايت د پوهنې رئيس په وينا، دغه ښوونځى پخوا جوړ شوى و؛ خو د ټولګيو د نشتوالي له امله يې يو شمېر زده کوونکو په آزاده فضا کې زده کړې کولې او د همدې ټولګيو په جوړېدو سره به يې شاوخوا ۵۰۰ تنو زده کوونکو ته د زده کړې خوندي چاپېريال رامنځته شي.
د يادونې وړ ده، چې تېره اوونۍ د پکتيکا ولايت پوهنې رياست له لوري په بکخېلو ولسوالۍ کې دوه بابه نوي ښوونځي تاسيس او پرانيستل شول.
