د ښوونکو او زدهکوونکو لپاره د احصائیوي فارمټ نوی سیسټم پرانیستل شو
د پوهنې وزارت د کیفیت تضمین معینیت لخوا، د تعلیمي مرکزونو د ښوونکو او زدهکوونکو د دقیقو احصائیو او ارقامو درلودلو په موخه، د معلوماتو مدیریت سیسټم (EMIS) کارپوهانو په همکارۍ، د ښوونکو او زدهکوونکو د احصائیو راټولولو او ثبت لپاره یو نوی سیسټم رامنځته او پرانیستل شو.
د یاد سیسټم د پېژندګلوۍ په مراسمو کې، د پوهنې وزارت د کیفیت تضمین معین محترم الحاج مولوي عبدالخالق صادق، د پلان جوړونې په پروسه کې د احصائیو رول خورا ګټور وباله او ویې ویل: د تعلیمي پروګرامونو پلي کولو لپاره، موږ دقیقو احصائیو ته جدي اړتیا لرو، چې له نېکهمرغه د دغه نوي سیسټم په پلي کولو سره به د پورته مسایلو په عملي کولو کې زیاته اساني رامنځته شي.
ورپسې د پوهنې وزارت د معلوماتو مدیریت سیسټم رئیس محترم مولوي بسم الله نعماني او د کابل ښار پوهنې رئیس محترم مولوي جنت ګل عزیز هم د موضوع په هکله خبرې وکړې او د ګډونوالو لپاره یې د پورته ذکر شوي فارمټ اسانتیاوو په اړه مفصل معلومات وړاندې کړل، چې د ګډونوالو له خوا یې په پراخه کچه هرکلی وشو.
