د کابل ولایت شکردره ولسوالۍ کې د یو باب ښوونځي بنسټ ډبره کېښودل شوه
د کابل ولایت پوهنې ریاست په یوه خبرپاڼه کې ویلي: د یاد ولایت پوهنې رئیس الحاج مولوي عبدالحق حقاني په شکردرې ولسوالۍ کې د یو باب منځني ښوونځي د بنسټ ډبره کېښوده.
د چارواکو په وینا، له پوهنې سره یو همکار بنسټ د کابل ولایت په ۷ ولسوالیو کې د ۸ بابه ښوونځیو د جوړولو چارې پیل کړې دي، چې د شکردرې ښوونځی هم له دې حملې څخه دی.
د ښوونځی دغه ودانۍ چې ۶ درسي ټولګي، ۲ اداري خونې او نور اړین ملحقات به ولري، د ۱۰ مېلیونه ۵۴۶ زره ۴۷۲ افغانیو لګښت سره جوړېږي.
د سیمې خلکو د خپلو ماشومانو لپاره د دغه ښوونځي پر جوړېدو د خوښۍ ترڅنګ، په هېواد کې د متوازنو پوهنیزو پرمختګونو په برخه کې د پوهنې وزارت د هڅو ستاینه وکړه.
