له ولایتونو څخه د پوهنې کړنو ته لنډه کتنه
هرات
د هرات ولایت پوهنې رئیس مولوي رحمت الله جابر د ياد ولایت مرکز اړوند د یوه خصوصي ښوونځي د زده کوونکو له لیلیې څخه لیدنه وکړه.
نوموړي د زده کوونکو د هڅونې پرمهال، د ياد ښوونځي له مسئولينو وغوښتل، ترڅو خپلې چارې د پوهنې وزارت له کړنلارو سره سم او د ياد ولايت د پوهنې رياست سره په همغږۍ ترسره کړي.
دایکنډي
د دايکنډي ولايت پوهنې رئيس الحاج مفتي رحمت الله مدثر، د خدير ولسوالۍ د مرکزي او پشني لېسو اداري او تدريسي فعاليتونه وڅېړل.
په ورته مهال نوموړي د پوهنې کارکوونکو ستونزې واورېدې او د حل ژمنه یې وکړه.
لغمان
د افغانستان.ا.ا. عالي رهبرۍ د فرمانونو، لارښوونو او احکامو د تطبیق او څارنې پلاوي، د لغمان ولایت له پوهنې رئیس مولوي شاه جهان ساجد سره وکتل او خپله موخه يې د عالي رهبرۍ د حکمونو له تطبیق څخه څارنه وبلله.
د لغمان پوهنې رئيس ياد پلاوي ته د ښه راغلاست په ترڅ کې، د يادې موضوع د عملي کېدو په برخه کې له خپل لوري ډاډ ورکړ.
نورستان
د نورستان ولایت پوهنې رئیس د ياد ولایت نورګرام ولسوالۍ د پوهنې آمريت له اداري او تدریسي چارو څخه څارنه وکړه او د ياد آمريت له کارکوونکو سره یې د کتنې پر مهال له هغوی وغوښتل، چې ټولنې ته د خدمت لپاره وړ ښوونکي وړاندې کړي.
کاپیسا
د کاپیسا ولایت پوهنې رئیس مولوي محمد فرید حقاني په داسې حال کې چې د ياد ریاست د ښوونې او روزنې او مسئولینو يې هم ملتیا کوله، د حصه اول ولسوالۍ اړوند د ابو موسی اشعري (رضي الله عنه) مدرسې له اداري او تدریسي څانګو څخه څارنه وکړه.