هلمند ولایت کې د ۱۲ میلیونه افغانیو څخه په زیات لګښت یو باب ښوونځی تاسیس شو
د پوهنې وزارت له لوري د هلمند ولایت په دیشو ولسوالۍ کې «د خالد بن ولید رضیالله عنه» په نوم یو نوی ښوونځی تاسیس او په رسمي توګه یې فعالیت پیل کړ.
د یاد ولایت د پوهنې مسوولینو په وینا؛ دیشو ولسوالۍ چې د یاد ولایت له لېرې پرتو ولسوالیو څخه شمېرل کېږي، تر دې مهاله پکې هېڅ ښوونځی نه و موجود؛ خو اوس همدغه ښوونځی د پوهنې وزارت له لوري د یوه همکار بنسټ په مالي ملاتړ د ۱۲.۵ میلیونه افغانیو په لګښت جوړ او په رسمي ډول فعال شو.
مسوولینو زیاته کړه، چې د دې ښوونځي نوې ودانۍ شپږ درسي ټولګي، دوه اداري خونې او نورې اړینې تعلیمي اسانتیاوې لري، چې له امله به یې سلګونو زدهکوونکو ته د زدهکړې زمینه برابره شي.
د دیشو ولسوالۍ اوسېدونکو هم د دغه ښوونځي له جوړېدو خوښي څرګنده او د پوهنې وزارت له هڅو څخه یې، چې د هېواد بچیانو لپاره د خوندي او معیاري تعلیمي چاپېریال برابرولو په موخه ترسره کوي، مننه او قدرداني وکړه.
