په بادغیس ولایت کې د ښوونکو د مسلکي پراختیا ریاست د تشکیلاتي جوړښت په اړه مشورتي ناسته ترسره شوه
د پوهنې وزارت د ښوونکو د مسلکي پراختیا ریاست یو پلاوی، د رسمي کارونو د ترسره کولو او د ښوونکو د مسلکي پراختیا د ریاست د نوي تشکیلاتي جوړښت د وضاحت په موخه، بادغیس ولایت ته ولاړ.
یاد پلاوي د دغه سفر په ترڅ کې د بادغیس ولایت له پوهنې سرپرست محمد نبي صبور او یو شمېر نورو مهمو مسئولینو سره په کتنه کې، د ښوونکو د مسلکي پراختیا د ریاست جوړښت او کړنلاره تشرېح کړه.
همدارنګه یې د بستونو د انتقال او ټاکلو، د ښوونکو د روزنې او د ښوونیزې څارنې د غړو په اړه مسئولینو ته معلومات ورکړل.
د يادونې وړ ده، چې ياد پلاوي د دغه ولايت د پوهنې رياست د مسئولينو په همکارۍ د مرکز او ولسواليو د ښوونیزې څارنې د ١٠٢ تنو تحصیلي اسناد و څېړل، تر څو وړ کسان په نویو بستونو کې د دوی د زده کړې له مخې و ټاکل شي او پاتې کسان به د ځانګړي معیار له مخې د یاد ولایت په ښوونځیو کې د ښوونکو په توګه وګمارل شي.
د یادولو وړ ده، چې په دغه نوي تشکیلاتي جوړښت کې به هېڅ کارکوونکی له خپلو دندو څخه بې برخې نشي.
په پای کې د مسلکي پراختیا د نوي تشکیلاتي جوړښت په اړه د ګډون والو پوښتنو ته ځوابونه وویل شول.
